O Teucro firma un bo empate ante o Lanzarote

A Sociedad Deportiva Teucro sumou un valioso punto no seu segundo partido baixo a dirección de Sergio Carballeira, asinando un empate 24-24 ante o Lanzarote, segundo clasificado da Primeira Nacional.

Os azuis competiron de igual a igual nun duelo que se decidiu nos instantes finais.

O encontro arrancou cunha repartición equilibrada de goles, con ambos os equipos alternando lixeiras vantaxes de tan só un tanto.

Así ocorreu até o minuto 18. Os tantos de Pintus e Rhuan colocaron o 9-7, Javi Aragón recortou para o Lanzarote, pero Pintus e Dani Monteagudo ampliaron até o 11-8, forzando o tempo morto visitante.

Os canarios reaccionaron para colocarse a un gol (12-11), o que levou a Carballeira a parar o cronómetro. Iago Vidal e Rhuan responderon para pór o 14-11, aínda que Abián Martín fixo o 14-12 co que se chegou ao descanso.

Ao cinco minutos da continuación chegou o empate (15-15), pero a exclusión de Santiago Enzo permitiu ao Teucro aproveitar a superioridade numérica e elevar a renda até o 20-16.

Esa vantaxe durou apenas seis minutos, e é que os visitantes igualaron a 22 cando restaban apenas sete minutos por xogar.

Todo quedaba por decidir na recta final, pero as sólidas defensas impuxéronse aos ataques, concedendo apenas dous goles para ambas as escuadras.

O Teucro resistiu ao empuxe do rival, certificando un empate que deixa moi boas sensacións ao equipo (24-24).

Consulta as estatísticas neste enlace