O Tenis de Mesa Monte Porreiro arrincou o ano cun empate a domicilio fronte ao CTT Olot, nun partido que comezou gañando 0-2.
O conxunto pontevedrés quedou moi preto de sumar unha vitoria tras dominar boa parte do encontro, pero os locais lograron reaccionar antes de que Nico Galvano, no choque decisivo, asegurase a igualada.
No primeiro partido, Rafa de las Heras e Martín Bentancor convertéronse en protagonistas dun duelo que non se decidiu ata o quinto xogo (2-3).
O Monte Porreiro mantivo a súa vantaxe co triunfo de Miguel Ángel Vílchez sobre Arnau Pons (1-3), que colocou un esperanzador 0-2 no marcador global.
O encontro puido encarrilarse a favor dos de Pontevedra no terceiro enfrontamento, pero Miguel Ángel Pantoja evitou o 0-3 ao derrotar por 3-1 a Nico Galvano, recortando distancias e reactivando o equipo local (1-2).
A partir de aí, o Olot deu un paso á fronte e De las Heras superou a Vílchez por 3-1, devolvendo a igualdade ao marcador (2-2).
A remonta completouse no seguinte duelo, cando Pantoja se impuxo por 3-1 ante Bentancor para colocar por primeira vez ao Olot por diante (3-2).
Con todo, no decisivo e último choque, Nico Galvano asinou unha actuación impecable para vencer con autoridade por 0-3, selando o empate definitivo (3-3).
A seguinte cita do equipo pontevedrés será o sábado 24 de xaneiro no Pavillón Príncipe Felipe ante o Priego TM.
Consulta a acta neste enlace