Todo está listo xa na praia de Silgar, en Sanxenxo, para acoller a segunda xornada da Liga Europea de Fútbol Praia.
Turistas e bañistas mestúranse estes días cos deportistas que proban o estado da area para unha competición que reunirá a 13 seleccións nacionais durante tres días de emoción.
Con capacidade para ao redor de 2.000 persoas, o estadio instalado na popular praia contará con entrada de balde para o público.
O evento, cuxos detalles explicaron este xoves en rolda de prensa, arrincará ás 13:00 horas do venres cun partido entre os equipos de Inglaterra e Andorra.
España, que buscará en Sanxenxo a súa clasificación para a gran final do torneo, xogará cada día na última das quendas: o venres ás 19:15 horas ante Romanía, o sábado ás 19:15 horas ante Francia e o domingo ás 18:45 horas ante Ucraína.
A competición estrutúrase en dúas divisións, A e B, e cada unha delas contará con dous grupos.
Na rolda de prensa previa ao torneo estiveron presentes o presidente da Federación Galega de Fútbol, Rafael Louzán; o alcalde de Sanxenxo, Gonzalo Pita; a directora de Turismo de Galicia, Nava Castro; Ramiro Amarelle, representante de FIFA Beach Soccer; Gabino Renais, vicepresidente de Beach Soccer Worldwide e o seleccionador nacional español, Joaquín Alonso.
OBXECTIVO, MUNDIAL 2019
A Federación Galega de Fútbol non se conforma con organizar unha das principais competicións do fútbol praia europeo e xa pensa máis aló, concretamente no Mundial 2019.
Así o recoñeceu Rafael Louzán, quen tras a Copa RFEF en 2015 e a liga Europea en 2016 asegura que "para 2019 plantexamos o reto de organizar a Copa do Mundo", sinalou.