Sen público, con moitas medidas de seguridade pero coa esencia de sempre e coa importancia de que o deporte vaia recuperando a normalidade.
Así se celebrou durante a fin de semana a cuarta edición do Trofeo Cidade de Pontevedra de Bádminton, no pavillón do Centro Galego de Tecnificación Deportiva.
A competición era puntuable para o Ranking Nacional das categorías Sub-11 e Absoluta, sendo o primeiro evento deportivo para as novas promesas do bádminton desde o parón provocado pola Covid.
A nivel de resultados a local Ana Carbón, do Bádminton Ravachol Pontevedra, foi unha das grandes protagonistas con dúas medallas, unha de ouro no dobres mixto e outra de prata na categoría individual feminina. Pola súa banda o club anfitrión tamén conseguiu unha medalla de prata con Manuel Brea no dobres masculino.