Contratempo importante na planificación deportiva da Sociedad Deportiva Teucro, que perde a un dos puntais do equipo, especialmente na faceta defensiva.
Víctor Rodríguez xogará a próxima tempada na Liga Asobal da man do Atlético Valladolid, recentemente ascendido pero cun gran potencial económico e deportivo.
Víctor Rodríguez abonará a cláusula de rescisión para fichar polo Valladolid
O xogador reuniuse esta semana, ao seu regreso do Mundial de balonmán praia no que participou coa selección nacional, coa comisión deportiva do Teucro para comunicarlles que abonará a cláusula de rescisón que figura no seu contrato.
A directiva pontevedresa era coñecedora do interese do Atlético Valladolid polo seu xogador, pero ata agora non escoitaran de primeira man as súas intencións.
Víctor, a pesar de comprometer a súa continuidade cos azuis ao finalizar a pasada tempada, aceptou a oferta valisoletana, non moi superior no económico pero atractiva para el por permitirlle continuar na máxima categoría nunha cidade na que tamén finalizar os seus estudos.
A noticia caeu como un xerro de auga fría nos responsables deportivos teucristas, que se puxeron en marcha para buscar un substituto de garantías.
BALENCIAGA, Á ESPERA
Outro xogador que segue sen resolver o seu futuro no equipo teucrista é Erik Balenciaga. O central vasco conta cunha oferta do Anaitasuna navarro para continuar na máxima categoría, pero o Teucro remítese á cláusula de rescisión para deixalo saír, xa que lle resta un ano de contrato.
O Anaitasuna ofrece 2.000 euros aos pontevedreses, que non aceptarán menos cantidade da que figura no contrato (5.000 euros). Ambas as partes esperan resolver a situación antes do inicio da pretemporada, fixado para o próximo 1 de agosto.