Obxectivo conseguido. A XXXV edición da San Silvestre de Pontevedra superouse a si mesma alcanzando o reto que se impuxeron os seus organizadores, a Sociedade Gimnástica co apoio do Servizo Municipal de Deportes, de mellorar a cifra de 6.450 corredores da edición anterior, chegando, segundo datos oficiais, a un total de 6.417 dorsais retirados, o que sumado ás numerosísimas persoas que se presentaron para correr a pesar de non inscribirse previamente, fai unha nova cifra récord de máis de 7.000 participantes.
Como xa é habitual, ata a avenida Montero Ríos de Pontevedra desprazáronse persoas de todas as idades, moitas en grupos e un bo número deles disfrazados ou completando a súa vestimenta con adornos do Nadal. En xeral, o ambiente resultou festivo e agradable e non houbo que lamentar incidentes destacables.
No súa trixésimo quinta edición, a carreira saíu como de costume de Montero Ríos, nesta ocasión cunha lixeira redución no seu percorrido, que quedou en 4.5 quilómetros, debido ás obras na contorna da rúa Cruz Vermella, que facían imposible o paso dos corredores.
Así, tras saír de Montero Ríos e pasar pola praza de España, a carreira virou cara a Alameda para acceder a Raíña Vitoria, Xeneral Rubín, o paseo cuberto do Gafos, praza da Constitución, praza de Galicia, Andrés Mellado, Peregrina, García Camba, Oliva, Riestra e de novo á praza de España, para seguir por Michelena, praza da Peregrina, García Camba, Oliva, Riestra, praza de España, Ferrería, Curros Enríquez, Real, Sarmiento, Pai Amoedo, Sierra, García Escudero, Ponte, San Telmo, praza do Peirao, Arcebispo Malvar, Pardo Bazán, Concepción Arenal, Martitegui, Prudencio Landín, praza de España e chegada a Montero Ríos.
En todo momento a proba contou cun eficaz dispositivo de seguridade da Policía Local e Protección Civil de Pontevedra.
Á liña de meta chegaron en primeiro lugar, na categoría de mulleres, Iria Rodríguez, Paula de la Torre e Saleta Castro. Entre os homes, os tres primeiros foron Antonio Serrat, que toma a substitución de Víctor Riobó como dominador da San Silvestre logrando a súa terceira vitoria consecutiva, seguido de Jorge Puig, que repite segundo posto, mentres Pablo García foi terceiro.
Como é costume, a Sociedade Gimnástica organizou paralelamente unha recollida solidaria de alimentos en favor de RedeAxuda e tanto o público como os participantes colaboraron na iniciativa.
Ademais, dez minutos antes da saída, a Sociedade Gimnástica rendeu homenaxe a tres persoas sen cuxa labor sería pouco menos que imposible a brillante traxectoria da veterana sociedade pontevedresa e da propia San Silvestre. Así, entregáronse placas conmemorativas e de agradecemento polo traballo realizado a Ramón Touza, polo seu traballo como presidente do club, Juan Romero como vicepresidente e a Jesús Cortegoso como secretario.
Ramón Touza colleu o mando do club en 1995. Nos 22 anos de presidencia, a Sociedade Gimnástica de Pontevedra conseguiu moitos
premios. Os máis destacados son os 12 anos consecutivos que o equipo masculino mantívose en División de Honra. Ademais, nese período a entidade foi nomeada Mellor Club Galego en varias ocasións e levou a Copa de Clubs de Galicia de Pista Cuberta e de Aire Libre case todos os anos.
Charo Castro foi a encargada da substitución, acompañada por Santi Ferrer Moreira, como vicepresidente e Luís Tojal, como secretario.