Este 2025 Leonor de Borbón puxo fin á súa etapa de formación na Escola Naval Militar de Marín.
Entre xaneiro e xullo, a herdeira ao trono embarcouse no cruceiro de instrución do Juan Sebastián de Elcano, sete meses de océanos e portos que a levaron por case unha decena de países, con escalas en Uruguai, Chile, Perú ou Estados Unidos. Unha volta ao mundo en versión guardiamarina, con manobras, gardas e aprendizaxe a golpe de salitre.
O 13 de xullo, Marín recibiuna de volta como se recibe a quen xa é de casa, isto é, baixo a choiva, con emoción e con familiares e amigos agardando no porto. O regreso pechaba a súa etapa naval e abría o capítulo dos recoñecementos. Só tres días despois, o 16 de xullo, Leonor recibiu o seu Despacho Real de mans do Rei na propia Escola Naval, nunha cerimonia solemne que puxo broche de ouro a once meses de formación.
Pero se algo lembrou internet este verán foi o xa famoso resbalón do Elcano. Ao descender do buque, a princesa estivo a piques de perder o equilibrio. Non pasou nada, recuperou a compostura e seguiu adiante.
En xullo, Leonor recibiu a Medalla de Ouro de Galicia e pouco despois foi nomeada filla adoptiva de Marín. O acto no Concello foi breve, pero intenso, con máis de duascentas persoas esperándoa, saúdos un a un, fotos, aplausos e un pergamiño artesanal ilustrado con símbolos moi locais, desde a danza das espadas até as herbas de San Xoan. No libro de honra deixou unha frase que resume o seu paso pola vila: "Para todos os que pasamos pola Escola Naval Militar, Marín convértese na nosa casa". Morriña oficializada.
A xornada tivo mesmo melodía propia. A Banda de Música da Escola Naval estreou 'La joven guardamarina', unha peza composta na súa honra, con chiscadelas ao folclore galego, á Armada e até ao himno de Asturias. Detalles que explican por que Leonor confesou sentirse en Galicia "como unha galega máis" e lembrou con especial agarimo os furanchos e o ambiente da ría de Pontevedra.
O capítulo máis solemne chegou coa imposición da Gran Cruz do Mérito Naval, que lle entregou o seu pai, o rei Felipe VI, no acto de entrega de reais despachos aos novos oficiais. Miradas cómplices, abrazo contido, saúdo militar e unha escena que quedará para o álbum familiar e institucional. Leonor ascendía ademais a guardiamarina de segundo, como o resto da súa promoción.
E cando parecía que Marín quedaba atrás, chegou o epílogo deportivo. En outubro , a princesa regresou á vila sen uniformes de gala nin discursos, volveu en chándal, integrada no equipo de esgrima do Campionato Interacademias 2025. Competiu con normalidade, conviviu cos seus compañeiros e confirmou que o seu vínculo coa ría non era só protocolario.