A proximidade coa Gran Final das Series Mudniales de Tríatlon e a posibilidade de probar a zona de natación que se usará nos mundiais vai provocar unha participación de auténtico luxo na I Travesía a nado Río Lérez que organiza o Club Natación Galaico e que se celebrará este sábado 16 de setembro.
Ademais dos máis de 200 deportistas anotados para o evento, correspondente ao Circuíto Galego de Augas Abertas, os triatletas terán un papel protagonista con varios nomes propios.
Dous deles son de feito campións olímpicos e mundiais, auténticas figuras do deporte internacional.
Por unha banda en categoría masculina participará na travesía o noruegués Kristian Blummenfelt, ouro nos Xogos de Tokyo e campión mundial non só en distancia olímpica senón tamén de Ironman e 70.3, e que leva xa uns días en Pontevedra preparando a súa participación no Gran Final.
Tamén a proba feminina terá unha fugura do máximo nivel coa estadounidense Gwen Jorgensen, campioa olímpica en Río 2016 e dúas veces ouro mundial (2014 e 2015).
Completa a nómina de campións mundiais a húngara Zita Kuttor-Bragmayer, campioa de acuatlón.
Será a guinda a unha xornada deportiva na que se espera vivir un gran ambiente na contorna da praia fluvial, con actividade desde as 15.45 horas e durante boa parte da tarde.