O tradicional desfile de Entroido xa ten data e hora en Cuntis. Será o vindeiro domingo 15 de febreiro, a partir das 11:00 horas, segundo confirmou o goberno municipal.
"Febreiro é o noso mes grande, un momento no que Cuntis brilla con luz propia", afirmou o alcalde de Cuntis, Manuel Campos, que animou á veciñanza a encher as rúas de cor e creatividade durante estes días de festa.
O desfile, que terá a saída e a chegada no pavillón municipal de deportes, pasará pola Rúa Pedro Campos, a Circunvalación Don Aurelio, a Rúa da Presiña, a Rúa do Balneario e a Rúa Bernardo Sagasta, antes de volver cara á circunvalación e o pavillón.
O prazo de inscrición para participar na comitiva xa está aberto e estenderase ata o venres 13 de febreiro ás 13:30 horas.
A organización repartirá un total de 3.000 euros en premios, mantendo o esforzo por incentivar a participación neste desfile.
Así, haberá premios de 500, 400, 300 e 200 euros ás catro mellores comparsas, 250, 200, 150 e 100 euros aos catro mellores grupos, 110, 80, 65 e 50 euros ás catro mellores parellas e 75, 60, 40 e 20 euros aos catro mellores disfraces individuais.
A mellor carroza, pola súa banda, recibirá 400 euros de premio.
O xurado valorará diversos aspectos á hora de outorgar os galardóns: o deseño dos disfraces e a súa confección, a orixinalidade, a música, a coreografía e, moi especialmente, a animación e simpatía que despreguen os participantes durante o percorrido.
Campos destacou que co Entroido arrancan "semanas únicas" que unirán o mellor da gastronomía e Cuntis e o seu espírito festivo.
"Comezaremos saboreando o Tapalacón, seguiremos coa alegría do Entroido e todo isto serve de antesala para o noso día máis importante: a Festa do Lacón con Grelos", sentenciou.
O Concello de Cuntis reitera a súa invitación a todos os veciños, veciñas e visitantes da comarca para que participen activamente neste Entroido, contribuíndo a manter viva unha das tradicións máis divertidas do ano.