Parece que os pontevedreses tiñamos présa por votar, a medida que foi avanzando a xornada, fómonos moderando. O segundo avance de participación, que o Ministerio do Interior publicou ás seis da tarde, segue aínda así reflectindo máis votantes que en 2019.
Iso si, o aumento non é tan acusado como mostraba o voto matinal. A esta hora, na provincia de Pontevedra votaron 441.971 persoas, é dicir, o 57,43% do censo.
Este nivel está un 2,58% por encima das eleccións xerais de novembro de 2019, nas que ás seis da tarde votara un 54,85% dos electores con dereito ao voto.
Na cidade de Pontevedra seguimos por encima da media da provincia. Ata as seis da tarde rexístrase unha participación do 57,94%, tras pasar polos colexios electorais un total de 38.551 cidadáns e cidadás. É un 3,19% máis que hai catro anos.
Esta tendencia ao incremento da participación rexístrase tamén en toda Galicia, onde un 55,96% dos votantes, 1.239.543 persoas, pasaron xa polas urnas. É un 2,70% máis.
Con todo, no conxunto do Estado cambian os datos e xa hai menos votantes que nas últimas eleccións xerais. Polo menos, ata este momento.
Un total de 18.660.325 españois e españolas votaron este 23J, o que se traduce nun 53,12% do censo total de electores. Son case catro puntos menos que en 2019, concretamente un 3,73%. Naquel momento votara un 56,85% das persoas rexistradas no censo.
Galicia é a comunidade onde máis creceu a participación, seguida de Estremadura, Baleares, Cantabria, Canarias e Asturias. No resto de rexións, os datos reflicten descenso, especialmente acusado en Cataluña, Madrid, País Vasco ou Aragón.
Estes datos inclúen tan só a participación da xente que votou presencialmente en urna, xa que o relativo ao voto por correo sumarase ao final da xornada.