O número de parados rexistrados nas oficinas do servizo público de emprego da cidade de Pontevedra volveu baixar no mes de xullo. O tirón estacional reduciu o número de desempregados en 392 persoas con respecto ao mes anterior, un comportamento que coincide cos datos rexistrados a nivel estatal e autonómico. Así, o total ascende actualmente a 6.334 persoas sen emprego, un 5,83% menos que en xuño.
O descenso nos datos do paro é xeralizado en todos os concellos da provincia. En todo caso, aqueles cun maior interese turístico é onde se producen os maiores descensos. Sanxenxo, Bueu, Poio, Marín ou O Grove son algúns dos municipios no que a evolución do emprego foi máis positiva neste último mes.
| Xullo 2016 | Xuño 2016 | Variación | |
| Pontevedra | 6.334 | 6.726 | -392 |
| Barro | 317 | 345 | -28 |
| Bueu | 753 | 900 | -147 |
| Caldas de Reis | 840 | 905 | -65 |
| Cambados | 1.035 | 1.205 | -170 |
| Campo Lameiro | 164 | 174 | -10 |
| Cotobade | 326 | 370 | -44 |
| Cuntis | 405 | 436 | -31 |
| O Grove | 705 | 791 | -86 |
| A Illa de Arousa | 290 | 398 | -108 |
| A Lama | 192 | 205 | -13 |
| Marín | 1.849 | 2.015 | -166 |
| Meaño | 316 | 400 | -84 |
| Meis | 374 | 418 | -44 |
| Moraña | 414 | 434 | -20 |
| Poio | 1.092 | 1.235 | -143 |
| Ponte Caldelas | 563 | 589 | -26 |
| Portas | 243 | 262 | -19 |
| Ribadumia | 337 | 389 | -52 |
| Sanxenxo | 864 | 1.091 | -227 |
| Vilaboa | 448 | 497 | -49 |
| Vilagarcía de Arousa | 3.688 | 3.850 | -162 |
| Vilanova de Arousa | 837 | 916 | -79 |
DATOS PROVINCIAIS
Ademais, na provincia reduciuse o número de desempregados en 4.708 con respecto o mes anterior. Segundo o avance do paro rexistrado en xullo do Servizo Público de Emprego Estatal (SEPE), o número de demandantes de emprego na provincia situouse ao remate do mes de xullo en 77.596 persoas, 4.708 menos que un mes antes e 8.297 menos que un ano antes.
Así, segundo os datos achegados, o descenso do paro en xullo con respecto a xuño foi do 5,72 por cento, mentres que se se toma como referencia a variación interanual esa baixada do número de demandantes de emprego na provincial é moito maior e sitúase nun 9,66 por cento con respecto a xullo de 2015.
Os 4.708 parados menos de Pontevedra supoñen o 39,7 por cento do total das persoas que deixaron de ser demandantes de emprego en toda a comunidade galega e a provincia sitúase como a de maior descenso, fronte aos 4.392 menos da Coruña, 1.518 de Lugo e 1.245 de Ourense.