Este mércores decenas de delegados dos sindicatos UXT e CC. OO. concentrábanse ante a Subdelegación do Goberno de Pontevedra para reclamar a derrogación da reforma das pensións do 2013.
Estes sindicatos indican que, durante o período máis grave da crise económica, no concello de Pontevedra miles de familias puideron subsistir grazas a 5.844 pensionistas, o que significa que catro de cada dez pensións axudaron a que familias en situación difícil conseguisen saír adiante.
Actualmente na provincia, as pensións son unha fonte de ingresos de 207.000 persoas na provincia, de 24.000 na comarca e 14.721 no concello de Pontevedra.
Denuncian que o Goberno de Mariano Rajoy non revalorizou as pensións nos orzamentos xerais do Estado para este ano e tampouco ofrece solucións aos problemas da Seguridade Soccial.
Estes sindicatos inciden en que é necesario garantir a viabilidade do sistema de pensións porque, pola contra, a relación media entre a pensión e o último salario caerá do 80% a menos do 50% provocando unha perda de poder adquisitivo moi grave para os pensionistas.