8M | "Avanzar non debería ser unha batalla individual, debería ser un compromiso compartido"

A Deputación de Pontevedra conmemorou este venres o Día Internacional da Muller no vestíbulo do Pazo Provincial coa lectura do manifesto a cargo de Marina Pérez González, directora deportiva e secretaria das Traviesas Hockey Club.

Marina Pérez, a única muller que adestra un equipo masculino en categoría nacional de hockey sobre patíns, celebrou os avances conseguidos polas mulleres, aínda que alertando do "momento espacialmente complexo" que se está vivindo.

Pérez puxo o foco nas redes sociais, que "tentan definir como debe ser unha muller e que presentan a igualdade como unha ameaza" e denunciou que reducen "o proxecto vital das mulleres para encaixar en expectativas alleas".

Impoñen "mulleres máis pequenas para que outros se sintan seguros" e transmiten aos nenos "unha idea ríxida de masculinidade" que ve a igualdade como ameaza.

No deporte, afirmou, "vemos actitudes que cuestionan a capacidade das nenas e minimizan os seus logros", explicou, lembrando á Marina de 16 anos que quixo ser adestradora e que actualmente ocupa un espazo "que non parecía pensado para ela".

"Se crecese nesta contorna, daría ese paso? Sentiría a confianza suficiente para intentalo? Non o sei. Esa dúbida é a que máis me preocupa. Porque se a resposta fose que non, aquela adolescente non se convertería na muller que son hoxe nin estaría aquí, diante de todas e todos vostedes. E isto significa algo aínda máis preocupante: que quizá xa estamos a perder a moitas nenas e adolescentes están a construír a súa identidade nunha contorna que lles fai crer que, para gustar, non deben destacar", lamentou.

Neste sentido, pediu asumir responsabilidade social porque "o que fagamos hoxe terá consecuencias reais mañá".

É por iso que a adestradora dedicou este 8M "ás nenas e adolescentes que hoxe están crecendo e construíndo quen queren ser. Polas mulleres que seguen marcando o camiño. Vai por todas as que non estamos dispostas a dar pasos atrás, pero que tampouco queremos ter que avanzar soas. Porque avanzar non debería ser unha batalla individual, debería ser un compromiso compartido", concluíu.

O presidente da Deputación, Luís López, tamén tomou a palabra, comparando a igualdade "cunha carreira irrenunciable" que require "esforzo, tenacidade e rebeldía", lamentando as mochilas invisibles que levan ás costas as mulleres como a brecha salarial ou o bloqueo do acceso das nenas a algunhas carreiras científicas.

Destacou os 6 millóns de euros que investiu o Goberno provincial en igualdade, en axudas contra a violencia machista e a visibilización de perfís femininos no seu equipo de goberno.

Por último insistiu en que a carreira pola igualdade "é unha marcha conxunta na que na meta non espérannos medallas, senón algo máis importante: a satisfacción de construír novas sociedades que non discriminan".

O acto incluíu a interpretación de dúas pezas de Clara Schumann e María Mendoza a cargo de María Fernández (clarinete), Lucía Legris (frauta) e Magdalena Argibay (piano) do Conservatorio Superior de Vigo.

Tamén se presentou o vídeo da campaña deste ano: 'A nosa meta: a igualdade'.