A Deputación de Pontevedra deu a coñecer este venres a súa nova campaña institucional con motivo do 8 de Marzo, Día Internacional das Mulleres, baixo o lema A nosa meta, a igualdade.
A iniciativa foi presentada en rolda de prensa polo presidente provincial, Luis López, quen subliñou que a elección do lema responde á convicción de que "a igualdade é un obxectivo que aínda non acadamos, pero que é irrenunciable para todos".
Durante a comparecencia, o mandatario incidiu en que as fendas entre mulleres e homes continúan presentes en múltiples ámbitos da sociedade. "A desigualdade segue a ser un problema que está presente en todos os eidos" e, por iso "non podemos mirar cara outro lado", advertiu, ao tempo que destacou que o goberno provincial está a impulsar medidas concretas para avanzar neste terreo.
A campaña terá visibilidade física nas sedes institucionais. Á entrada do Pazo provincial instalouse un panel identificativo, mentres que a fachada da sede de Vigo loce desde este venres unha lona coa imaxe da iniciativa.
Ademais, ambos edificios permanecerán iluminados de cor morada ata o 10 de marzo, como xesto simbólico de apoio á reivindicación da igualdade.
O acto central do programa conmemorativo desenvolverase o venres 6 de marzo, ás 11.00 horas, no Pazo provincial. Nel terá lugar a lectura do manifesto a cargo do club Hockey Travesas, recoñecido na última edición dos Premios Boas Prácticas en Igualdade.
A xornada incluirá tamén unha actuación musical do alumnado do Conservatorio Superior de Música de Vigo, a estrea do spot da campaña e a distribución de material de sensibilización.
A programación estenderase máis alá dese día cun abano de actividades que abrangue iniciativas participativas e culturais. Entre elas figura o concurso E ti, que pensas da igualdade?, cuxo prazo de inscrición permanecerá aberto ata o 13 de marzo, así como concertos e exposicións nas cidades de Pontevedra, Vigo e Vilagarcía de Arousa.
Tamén regresará o ciclo de conferencias Ciencia en feminino, que se celebrará todos os mércores do mes.
Na fin de semana posterior ao 8M terá lugar a novena edición do encontro As mulleres que opinan son perigosas no Teatro Principal de Pontevedra.
Coincidindo co acto institucional do día 6, publicaranse no Boletín Oficial da Provincia as bases da cuarta convocatoria dos premios vinculados a este foro.
A Deputación avanzou, ademais, outras accións pendentes de concreción de datas, como novos encontros no marco do programa provincial Aquí Faltan Páxinas, unha nova edición do ciclo Mulleres de Palabra(s) e a presentación dun mural realizado pola artista Alba Troiteiro no Centro Penitenciario da Lama.
Para pechar a presentación, Luis López apelou á perseveranza institucional nesta materia. Definiu a igualdade como "unha carreira de fondo", con desafíos renovados e obstáculos persistentes, e garantiu que o executivo provincial manterá unha postura firme na defensa dos dereitos das mulleres.
"Non imos dar nin un só paso atrás, non imos renunciar a ninguén nesta loita", concluíu.