O penúltimo cartucho que tiña o goberno local para aprobar o orzamento de 2017 gastouse. BNG e PSOE romperon as negociacións que comezaran apenas hai 24 horas para acordar as contas municipais para o próximo ano.
Tras só media hora de reunión, ambas as partes puxeron fin ás conversacións. Os nacionalistas aseguran que o PSOE non expuxo cuestións "directamente relacionadas" cos orzamentos, mentres que os socialistas criticaron a "pouca man esquerda" do grupo de goberno para negociar, a pesar da disposición mostrada para chegar a un acordo.
O portavoz socialista, Agustín Fernández, explicou que o equipo negociador do BNG -formado por Raimundo González e Carme da Silva- trasladoulles que non consideran "axeitada" a proposta presentada polo PSOE e que non a estudarán.
Fernández asegurou que os socialistas expuxeron mesmo "aparcar" os asuntos que o BNG podería considerar "conflitivos" como a remunicipalización da auga ou as bonificacións na contribución para poder alcanzar un "acordo de mínimos".
O líder do PSOE en Pontevedra lamentou que o goberno local non quere "ir máis alá" do seu proxecto de orzamentos e non acepta negociar cuestións que darían "estabilidade" ao executivo durante todo o ano. Por iso, asegurou que "nós non podemos facer nada máis".
Para Raimundo González, "o máis cantoso" é que os socialistas planteaban cuestións que "cando estaban gobernando con nós facían xusto o contrario", especialmente no ámbito deportivo ou urbanístico. Ademais, destacou que ao igual que PP, o PSOE "non presentou nada con respecto ao orzamento", o que leva ao BNG a pensar que contan cun orzamento "bo" e que apenas ten "pegas" para a oposición.
"Serán eles os que teñan que xustificar o seu voto e contra e por que non a súa abstención", dixo.
Agora, o goberno municipal entregará este venres á oposición toda a documentación relativa ao orzamento e confía en que algún grupo tenga "sentidiño" e poida cambiar o sentido do seu voto na fase de presentación de emendas.
Neste sentido, o PSOE avanzou que farán as súas achegas na comisión porque o actual orzamento "podar mellorarse moito". En función das emendas que poida introducir decidirán se apoian ou se absteñen na aprobación do orzamento en pleno, aínda que advirten que se non se aceptan as súas propostas manterán o seu rexeitamento ás contas.