O 1 de abril iniciarase a campaña para presentar a declaración do Imposto sobre a Renda das Persoas Físicas, así o recolle este xoves 19 o Boletín Oficial do Estado, sen que se faga referencia nas disposicións xerais establecidas polo Ministerio de Facenda ao estado de alerta no que se atopa nestes momentos o territorio nacional polo espallamento do coronavirus.
O prazo finalizará o 30 de xuño, segundo o que se recolle no BOE, que publica os modelos de declaración do IRPF e o imposto de patrimonio de 2019. Segundo sinalan ao diario ABC desde o Ministerio, o 70% das declaracións saen a devolver e polo tanto, con esta medida, quérese beneficiar aos contribuíntes para que reciban as súas devolucións canto antes.
As principais novidades atópanse en que se simplifica a consignación da inmobles propiedade do contribuínte e para que resulte máis sinxelo declarar as rendas de inmobles que se alugaron, o borrador desagrega conceptos como os gastos deducibles ou a amortización para calcular o rendemento neto de capital.
Outra das novidades é a simplificación na identificación do domicilio fiscal do contribuínte. Establécese un apartado separado para estes datos. Tamén resultará máis fácil realizar a declaración de rendementos de actividades económicas de estimación directa.
Todos os contribuíntes poderán acceder ao seu borrador a través do programa Renda web, coa identificación a través de certificado electrónico, cl@ve PIN ou co número de referencia onde poderán modificalo, confirmalo e presentalo.
As declaracións poderanse presentar por internet e por teléfono ou achegándose ás oficinas da Axencia Estatal de Administración Tributaria, previa solicitude de cita
Engade Pontevedra Viva como fonte preferida de Google de balde
Mantente informado coas últimas noticias de actualidade.