A Garda Civil denunciou a un veciño de Pontevedra que foi sorprendido cando conducía un furgón-taxi, en servizo de transporte escolar, baixos os efectos de estupefacientes.
A infracción detectouse onte, sobre as 14 horas, á altura do quilómetro 5+800 da estrada N-550, no municipio de Vilaboa, cando unha patrulla do Destacamento de Tráfico da Garda Civil de Vilaboa, interceptou unha furgoneta de transporte escolar que levaba, nese momento, tres alumnos.
O vehículo era conducido por un home de 49 anos, que ao ser sometido á proba de detección de drogas deu resultado positivo indiciario en opiáceos e metanfetaminas.
Ante estas circunstancias, procedeuse á inmobilización provisional do vehículo ata a chegada doutro condutor alternativo.
O condutor da furgoneta foi denunciado por unha presunta infracción moi grave que, de confirmarse os resultados positivos, conleva unha sanción económica de 1.000 euros e a perda de 6 puntos do permiso de conducir.