O Concello de Ponte Caldelas pechou o calendario das degustacións de promoción da LI Festa da Troita, que supoñen un total de 25 paradas no rural do municipio.
Esta xira promocional terá a súa primeira cita o 2 de maio na Reigosa e concluirá o día 26, xusto a tempo para a celebración da gran festa gastronómica, prevista para a última fin de semana do mes, os días 27 e 28 de maio.
Será o segundo ano no que se realicen degustacións previas, coa previsión de consumir ata 1.500 racións a un prezo que se manterá nos 3 euros.
A iniciativa xurdiu polo 50 aniversario da celebración gastronómica "pero démonos conta de que era unha fórmula para compartir a marca Ponte Caldelas con todos os nosos veciños e, ao mesmo tempo, unha oportunidade de convivencia non só entre a xente, senón tamén entre eles e este goberno municipal", recoñece o alcalde, Andrés Díaz.
Tras a degustación do 2 de maio na Reigosa a programación continuará na seguinte orde: A Insua, día 3; A Roca, 4; Taboadelo, 5; Forzáns, 6; Anceu, 7; Barbudo, 8; Esfarrapada, 9; Laxoso, 10; Parada, 11; Cuñas, 12; Silvoso, 13; Baltar,14; Tourón, 15; Chaín, 16; Paradela e Gradín, 17; Pazos, 18; Vilarchán, 19; A Fraga e Caritel, 20; Buchabad, 21; Mirón, 22; Rebordelo e Coveliño, 23; Contixe,24, Regodobargo, 25 e Xustáns, 26.