O municipio de Pontevedra atópase desde este luns, 4 de agosto, en alerta vermella sanitaria por altas temperaturas, segundo comunicou o 112 da Xunta de Galicia ás 12.49 horas.
Trátase do nivel máximo de aviso segundo o Plan de Actuacións fronte ás vagas de calor, e implica a activación inmediata de medidas para protexer a saúde da poboación.
A situación obrigou ao peche de todas as instalacións deportivas municipais, tanto ao aire libre como en espazos interiores, e á suspensión da actividade deportiva federada ao aire libre, tal como decretou tamén a Secretaría Xeral para o Deporte da Xunta.
O Concello de Pontevedra fixo extensiva esta decisión a campos de fútbol, pavillóns e outras infraestruturas municipais, que permanecerán pechadas ata as 23.59 horas deste luns 4 de agosto, ou ata novo aviso segundo a evolución meteorolóxica.
Como medida complementaria, o Concello abriu as fontes ornamentais da cidade, que permanecían pechadas nos últimos días debido á escaseza de auga, para que actúen como zonas de alivio térmico para a cidadanía.
Segundo informa Meteogalicia, este episodio de calor está marcado por un incremento das temperaturas pola desaparición do vento do nordés.
As previsións apuntan a que mañá martes o nordés volverá activarse, provocando un descenso térmico especialmente na metade norte do país.
A Xunta, a través da Secretaría Xeral para o Deporte, determinou a suspensión da actividade deportiva federada no exterior por mor da alerta por episodio de calor na xornada deste luns en concellos das Rías Baixas e do interior da provincia de Pontevedra, así como do suroeste da provincia da Coruña e de Valdeorras.
RECOMENDACIÓNS
Tanto a Xunta de Galicia como o Concello de Pontevedra insisten en seguir unha serie de recomendacións básicas para previr golpes de calor, especialmente entre a poboación máis vulnerable como persoas maiores, nenos pequenos e persoas con enfermidades crónicas:
-
Beber líquidos fríos con frecuencia, sen agardar a ter sede.
-
Evitar comidas copiosas e priorizar alimentos frescos.
-
Usar roupa lixeira, de cores claras, lentes de sol, sombreiro ou gorra.
-
Empregar cremas solares protectoras.
-
Permanecer en lugares ventilados ou á sombra.
-
Baixar as persianas durante o día e ventilar pola noite.
-
Evitar a actividade física nas horas centrais do día.
-
Nunca permanecer nun vehículo estacionado sen ventilación adecuada.
En caso de sufrir síntomas compatibles cun golpe de calor (como mareo, confusión, febre alta ou perda de conciencia), recoméndase contactar de inmediato co 061 ou o 112.
Mentres se agarda asistencia, débese trasladar á persoa afectada a un espazo fresco, refrescar o seu corpo con auga e, se está consciente, ofrecer pequenos grolos de líquido. No caso de inconsciencia, cómpre colocala de lado e non darlle de beber.
A evolución do episodio pode consultarse en tempo real na web de Meteogalicia e no portal Aire Saúde da Consellería de Sanidade, onde tamén se poden atopar recursos informativos e consellos de prevención.
As autoridades chaman á responsabilidade individual para minimizar riscos e protexer a saúde, especialmente nestes días de calor extrema que afectan a gran parte de Galicia.