Música e cor en Monte Porreiro co desfile do CEP Marcos da Portela.
Estudiantado e profesorado percorreu as principais rúas do barrio até a Galiña Azul, a EEI Fina Casalderrey e o IES Luís Seoane.
Encabezados polas comparsas As Flores do Carnaval e Os Canecos, e coa colaboración da ANPA O Miradoiro e a Policía Local, os membros do colexio desfilaron caracterizados de DJ, raperos e músicos como John Lennon.
Os participantes animaron a veciños, comerciantes e familias que saíron a fotografar e gozar do pasacalles máis lonxevo do barrio.
Os alumnos de sexto curso leron no patio do colexio a condena ao Meco, culpándoo a base coplas de "empatía desterrada", "xustiza que non ve" e permitir que "as nubes fagan bullying ao sol".
Tras repartir a súa herdanza satírica de clases de conga, unhas viaxes sen tensións ou anacardos, entre o profesorado e as diferentes clases do centro, o boneco foi enviado á fogueira.
A comunidade educativa e de Monte Porreiro clausuraron así un Entroido reivindicativo e divertido que encheu de alegría as rúas do barrio.
Engade Pontevedra Viva como fonte preferida de Google de balde
Mantente informado coas últimas noticias de actualidade.