Os concellos da provincia reciben da actual Deputación 63 millóns de euros este ano, 40 só dentro do denominado Plan Concellos. E iso sen contar coas infraestruturas. E Pontevedra e Vigo, sete millóns. É un dos datos que manexou a presidenta Carmela Silva para negar as acusacións realizadas polo PP, que aseguraba que se primaba a Pontevedra e Vigo fronte aos concellos máis pequenos.
"O PP ten que deixar de mentir á xente. A súa oposición é de todo menos seria", afirmou Carmela Silva, que destacou o "cambio radical" que deu a institución neste último ano, centrando a súa acción "nas necesidades dos concellos" e non en intereses partidistas.
Fronte a este "enorme esforzo" do actual goberno, a presidenta criticou que o executivo que presidía Rafael Louzán "e os seus acólitos" só investía nos concellos gobernados polos populares. Agora, insistiu, hai un control e unha xestión dos fondos "máis rigorosa" e execútase o que se orza.
Neste sentido, Silva recomendou a Nidia Arévalo, actual portavoz do PP, que "pida perdón" a todos os concellos da provincia polos 60 millóns de euros, a razón de 15 millóns cada ano, que Louzán tiña de libre disposición "abandonando aos concellos que non eran do PP".
A Carmela Silva asegura que "soa a risa" que os deputados populares critiquen que o decálogo de actuacións nas vías provinciais non se acordou cos alcaldes. Sobre todo cando, aclarou, remitiuse a todos os concellos para a súa aprobación e estase recibindo semanalmente aos rexedores, "que marchan encantados de aquí".
"Como se atreven a cuestionarnos a nós, que consultamos absolutamente todo cos concellos", engadiu a presidenta da deputación pontevedresa, que reiterou que na rolda de consultas que está a manter cos alcaldes para ver se se mantén o Plan Concellos para o próximo ano, algún rexedor do PP "me dixo que nin de broma o quitase".
Por iso, Silva afirmou que lle produce unha "profunda pena" a actitude dos deputados do PP, aos que lles pediu que reflexionen porque nesta provincia, dixo, os populares "deixan moito que desexar".