CC.OO. ve "cansos" aos traballadores por facer "sacrificios" ante os que "baten marcas"

Na que foi a manifestación do 1 de maio máis madrugadora en Pontevedra, decenas de persoas secundaron o chamamento á mobilización realizado por Comisións Obreiras.

Nun Día Internacional dos Traballadores que, un ano máis, se celebrou cunha completa división sindical, CC.OO. quixo esixir máis dereitos para a clase traballadora, apelando á necesidade de acordos para conseguir convenios xustos e mellores salarios.

Desde o sindicato advertiron que os traballadores están "cansos" de ter que facer "sacrificios" mentres que outros "baten marcas" de beneficios.

Os participantes na manifestación de Pontevedra, que partiu da Praza da Ferrería, reclamaron unha nova regulación para os despedimentos ou frear as contratacións temporais para combater os altos niveis de precariedade laboral.

Ademais, pediron ás administracións e á patronal que abandonen a súa estratexia de "represión" ante os dereitos dos traballadores, especialmente en materia de baixas laborais.

Reducir a xornada laboral "non é un capricho", sostiveron os responsables de CC.OO., xa que entenden que o progreso do país "non pode basearse en botarlle máis horas ao reloxo".

Comisións Obreiras tamén denunciou que o "desbocado" prezo da vivenda "se come" os incrementos salariais que se conseguen. "É indecente que moitas familias teñan que elixir entre comer ou pagar o recibo do mes", aseguraron.

Quixeron tamén abordar os perigos que, ao seu xuízo, ameazan á democracia, entre eles os ataques á igualdade ou o racismo dalgúns partidos, xa que os migrantes "son compañeiros da clase obreira" e deben ser regularizados.

"Cando se recorta en servizos públicos se lle rouba á clase obreira", insistiron desde o sindicato, que afirmou que os traballadores "non estamos sós e temos forza".