Este domingo, 27 de xullo, o nome de Jorge Canda pasará a formar parte do rueiro da Lama.
O ex alcalde, falecido en setembro de 2024, dará nome a unha rúa e este domingo celebrarase a estrea oficial coa colocación dunha placa sobre un monolito de pedra.
Con este acto, previsto para as 19.30 horas, o Concello oficializará a imposición do nome da Rúa Alcalde Jorge Canda.
A rúa escollida é a que discorre diante da Alameda, a derradeira obra impulsada baixo o seu mandato.
O evento contará coa presenza do rexedor da Lama, David Carrera; membros das corporacións municipais anteriores e actual; o presidente da Deputación Provicial de Pontevedra, Luís López; e alcaldes da provincia.
O acto será moi sinxelo, "acorde ás manifestacións de modestia e humildade de Jorge Canda", e consistirá no descubrimento do monolito de pedra coa placa.
Diante depositarán un ramo de flores ao tempo que a Banda de Música Municipal da Lama interpretará o himno de Galicia.
O pleno do Concello da Lama aprobou o pasado 31 de marzo de 2025 dedicarlle unha rúa a Jorge Canda Martínez, unha persoa que foi membro da Corporación municipal durante máis de 30 anos, 28 deles como alcalde.
O falecemento de Jorge Canda, o pasado 1 de setembro de 2024, produciu unha profunda consternación entre a veciñanza da Lama e entre o mundo político comarcal e provincial.