O Ateneo Santa Cecilia organiza unha nova edición do Enterro da Sardiña de Marín, o evento que marca o peche da programación do Entroido local.
Esta celebración, que conta coa distinción de Festa de Interese Turístico de Galicia dende o ano 2023, mantense baixo a xestión desta entidade cultural dende a década dos setenta co apoio do Concello de Marín e a Deputación de Pontevedra.
Os actos de despedida comezarán este luns 16 de febreiro coa apertura do libro de condolencias.
Este documento situarase na entrada da casa consistorial do Concello de Marín para que a veciñanza poida deixar por escrito as súas mensaxes ante a proximidade do fin das festas.
A xornada principal desenvolverase o mércores 18 coa instalación do velorio na Alameda de Marín.
Durante a tarde dese mércores, as persoas asistentes, ataviadas de loito, poderán acudir ao cadaleito da sardiña, onde se compartirá viño e pan de millo segundo marca o costume desta xuntanza popular.
A saída da divertida procesión mortuoria está fixada para as 20:00 horas, momento no que a comitiva iniciará un percorrido polas rúas Jaime Janer, Busto de Abaixo, Doutor Touriño Gamallo e Sol, ata chegar á Praza do Reloxo.
Neste punto procederase á lectura do pregón e á interpretación da ladaíña.
O acto finalizará co traslado do cortexo ao Paseo Alcalde Blanco, onde se procederá a tirar a sardiña ao mar ata o vindeiro ano.