Dous condutores foron denunciados durante as últimas horas por parte dun integrante de Masa Crítica Pontevedra que circulaba en bicicleta pola PO-551 procedente de Marín. Sinala que realizaron dous adiantamentos moi axustados, non só incumprindo os 1,5 metros de separación mínima lateral, senón que ambos pasaron a poucos centímetros do manillar do seu vehículo de dúas rodas.
Segundo sinalan desde Masa Crítica, o ciclista rodaba a 37 km/h. cando regresaba da praia e viuse en perigo porque os condutores non quixeron esperar a ter un momento no que puidesen adiantar de forma segura e legal.
Ante esta situación, á súa chegada a Pontevedra cursou denuncia ante a Policía Local para que a traslade ao subsector de tráfico e que se tramite a sanción de 200 euros estipulada pola lei, ademais da retirada de catro puntos da licenza de conducir.
Sinalan desde Masa Crítica que hai que respectar os 1,5 metros de distancia mínima lateral nos adiantamentos aos usuarios de bicicleta, esta manobra obriga a usar todo ou case todo o carril contrario. Lembran que é legal pasar unha liña continua sempre que non veña outro vehículo de fronte.
Este fin de semana faleceron cinco ciclistas en estradas de ámbito nacional. Para evitar accidentes, moitos usuarios de bicicletas saen con cámaras que proben estas situacións de risco que sofren.