Desbordados o río Gallo en Cuntis e o Gafos en Pontevedra polas fortes precipitacións de Herminia

O temporal que azouta este domingo as Rías Baixas está a provocar numerosas incidencias, sendo unha das máis graves o desbordamento do río Galo en Cuntis, que obrigou ao peche da rúa Bernardo Sagasta por acumulación de auga.

As autoridades municipais solicitaron a retirada de vehículos na Rúa do Convento e no aparcamento do restaurante Don Manuel, instando á poboación a evitar desprazamentos debido ao perigoso nivel dos cauces fluviais.

En Pontevedra capital, os efectos da borrasca Herminia provocou o derrubamento da carpa instalada para os Premios Feroz no aparcamento do Pazo da Cultura debido aos fortes ventos, que superaron os cen quilómetros por hora no interior da ría.

Segundo informa o Concello de Pontevedra, ante o perigo de que voase, bombeiros e técnicos dunha empresa de carpas aseguraron a instalación. Previamente, a Policía Local cortou o tráfico na avenida de Compostela para evitar calquera incidencia. 

CAÍDA DUNHA BICICLETA DESDE UN SEXTO PISO

Na rúa Loureiro Crespo caeu unha bicicleta desde un sexto piso enriba dun coche que estaba aparcado, informa o Concello de Pontevedra.

Segundo a investigación da Policía Local, a bicicleta estaba cuberta con plásticos que fixeron un efecto globo co vento causando a caída desde esa altura.

O coche sufría importantes danos e tivo que ser retirado polo guindastre.

Os servizos de emerxencias municipais da capital tamén rexistraron chamadas de particulares alertando de árbores caídas ou en risco de caída, ademais dalgún poste da luz e diversos colectores desprazados polo vento.

A asociación ecoloxista Vaipolorío tamén alertaba de que a borrasca producía a segunda enchenta do ano no río Gafos (Tomeza) durante esta xornada.

As precipitacións continúan sendo intensas, acumulándose máis de 50 litros por metro cadrado nas primeiras horas da tarde deste domingo.

A situación provocou que a Xunta active o plan Inungal ante o risco de desbordamento do río Lérez. A administración autonómica tamén estableceu a alerta vermella para todo o litoral pontevedrés para a xornada deste luns 27.

AXENTE DA GARDA CIVIL FERIDO

Tamén na AP-9, unha árbore caída preto da peaxe de Vilaboa arredor das 15.30 horas afectou ao tráfico en dirección a Vigo durante unha hora provocando medio quilómetro de retencións.

A Garda Civil e equipos de Emerxencia traballaron na retirada da árbore sobre ámbolos carrís da autoestrada. 

Un dos axentes do destacamento de Tráfico en Vilaboa resultou ferido, segundo confirmou a Garda Civil, ao ser golpeado pola árbore na cabeza mentres regulaba a circulación na zona.

Foi trasladado grave ao Hospital Álvaro Cunqueiro de Vigo, con prognóstico favorable. 

En Poio, dez voluntarios de Protección Civil traballaron con tres vehículos para resolver os problemas con postes de tendido eléctrico, caída de toldos, sinais e árbores. O operativo estivo activo de maneira continuada durante máis de doce horas. 

En Sanxenxo, a situación provocou o derrubamento parcial dun muro no colexio Abrente de Portonovo, ademais doutras incidencias como caída de árbores en calzada sen causar danos de gravidade, segundo indica o Concello de Sanxenxo.

En Marín, o Concello indica que unha árbore caída cortou o tráfico na estrada Pastoriza-Picotes,onde unha brigada municipal traballaba na retirada; varias planchas levantáronse en distintos edificios e nunha zona do CEIP do Carballal, que foron retiradas durante a tarde. 

Tamén na Rúa Lameira caeron un par de árbores e se rexistraron diversos incidentes menores polo rural, que foron atendidos por Protección Civil.

Os Concellos de Poio, Marín e Pontevedra estableceron o peche de parques e a suspensión de actividades ao aire libre e competicións deportivas.

En Caldas de Reis, o Concello traslada que os técnicos responsables do encoro comunicaron que o caudal do río Umia comezará a incrementarse nas vindeiras horas.

Por este motivo, piden á veciñanza que retiren os vehículos de zonas anegables como detrás do edificio do Concello, aparcamentos da Tafona ou Samadela e nos garaxes próximos en prevención de enchentes.

En Cambados rexistráronse importantes balsas de auga na Praza do Concello, Parador, Avenida de Galicia; Avenida de Castrelo; Avenida de Villagarcia; Pombal, Ribeira de Fefiñanes e Rotonda de Vilariño.

O servizo de Emerxencias de Cambados tamén tivo que intervir ante a caída de árbores en Quintáns-Castrelo, Tragove-Corbillón e Cobas de Lobos-Vilariño e no desprendemento de uralitas na Rúa Carreira.

As autoridades lembran que ante calquera emerxencia débese contactar co 112 Galicia, e recomendan extremar as precaucións nos desprazamentos que sexan imprescindibles.