Desfile festivo e multitudinario de Entroido sen paraugas pero con abrigos

O Desfile de Entroido de Pontevedra celebrouse na tarde deste sábado cunha climatoloxía seca, cumprindo coas previsións meteorolóxicas que descartaban precipitacións durante o percorrido.

A comitiva iniciou o seu trazado ás 17:00 horas desde a rúa José Malvar, despois da concentración e inscrición dos participantes, percorrendo logo vías céntricas como Benito Corbal, a Peregrina e Michelena ata finalizar na contorna da Alameda.

O evento rexistrou unha masiva afluencia de público, que presenciou o paso das comparsas equipado con roupa de abrigo debido ás temperaturas baixas da xornada provocadas pola entrada de vento do norte.

Algúns dos asistentes sinalaron que o tránsito dos participantes foi lento, identificando ocos entre as diferentes agrupacións durante o traxecto.

No apartado temático dos disfraces, destacaron poucas referencias á actualidade política.

Entre as propostas figurou unha recreación dun vehículo tipo Peugeot con figuras que aludían ao presidente do Goberno Pedro Sánchez na época en que viaxaba con José Luis Ábalos que, neste caso, agochábase no maleteiro.

Tamén chamou a antención unha caracterización de Donald Trump vestida como o personaxe de Darth Vader da saga Star Wars.

A xornada pechouse na praza da Ferraría coa festa do Entroido e a entrega de premios do concurso de disfraces.

Tras un domingo de descanso, a programación municipal retomará a súa actividade o luns 16 con obradoiros infantís, a presentación do Loro Ravachol na Praza da Peregrina e o inicio do concurso de murgas no auditorio do Pazo da Cultura.