O portavoz do grupo municipal do Partido Popular, Rafa Domínguez, acompañado polo concelleiro Guille Juncal, visitou as instalacións da Escola de Piragüismo Cidade de Pontevedra no peirao das Corbaceiras para denunciar o estado que consideran "lamentable" dun espazo que acolle unha das entidades deportivas máis destacadas da cidade.
Segundo sinalou o PP, este club desenvolve a súa actividade nunhas condicións que cualificou de indignas para un club de referencia e que dificultan cada vez máis o traballo diario de deportistas e técnicos.
Ao seu xuízo, esta situación non só complica o funcionamento da escola, senón que tamén pode afectar á súa masa social e comprometer a súa viabilidade no futuro.
Os populares lembraron ademais o importante labor formativo que desempeña a escola, pola que pasan cada ano máis de 150 nenos e nenas.
Alí formáronse deportistas de elite como Antía Jácome, Carolina García, Claudia Couto, Pablo Crespo ou Jaime Duro.
A concelleira de Deportes, Anabel Gulías, recoñeceu que se trata dunha cuestión complexa na que interveñen varias administracións.
Segundo explicou, o Concello mantivo diferentes reunións con Portos de Galicia, responsables do club e técnicos municipais para tratar de desbloquear a situación.
A orixe do problema remóntase a 2022. Até entón, a escola dispuña dunha cesión de uso das instalacións por parte de Portos de Galicia, propietaria dos terreos.
Con todo, a necesidade de acometer obras levou ao club a solicitar unha concesión administrativa que terminou xerando importantes dificultades.
Ao non tramitarse a exención de determinadas taxas, algo que anteriormente non era necesario, a entidade acumulou unha débeda que agravou a súa situación económica.
Posteriormente, o club tentou renunciar á concesión, aínda que esa vía tamén podía resultar prexudicial, polo que actualmente se traballa na caducidade do acordo. O resultado é que as melloras previstas non se executaron e a débeda continúa pendente.
En decembro de 2025, Portos de Galicia e o Concello de Pontevedra anunciaron a tramitación dun novo convenio de colaboración mediante o cal o Concello asumiría a xestión das instalacións e, con iso, a responsabilidade de executar a súa rehabilitación.
Mentres se avanza nese proceso, Anabel Gulías indicou que xa existe un acordo con Portos para habilitar colectores provisionais que permitan ao club manter a súa actividade deportiva.
A próxima semana está prevista unha reunión entre o goberno local e os responsables da entidade para abordar esta solución temporal.
Pola súa banda, o Partido Popular anunciou que presentará unha moción no pleno municipal de xuño para esixir ao goberno local do BNG que impulse con carácter urxente os trámites necesarios para iniciar a rehabilitación integral da Escola de Piragüismo.
A proposta tamén contempla a instalación de infraestruturas provisionais nas Corbaceiras mentres non finalicen as obras, co obxectivo de garantir a continuidade dos adestramentos e da actividade formativa.