Cinco estudantes do ciclo básico de Artes Gráficas do CIFP Montecelo comezaron esta semana unha experiencia internacional pouco habitual na Formación Profesional Básica como é unha mobilidade Erasmus+ na cidade italiana de Arezzo.
Durante varios días, o alumnado participará nun proxecto cultural xunto ao I.S. Tecnico Professionale Margaritone-Vasari, un centro de referencia no ámbito artístico e técnico.
A iniciativa conecta dúas figuras fundamentais da historia cultural europea. Por unha banda, Alfonso Daniel Rodríguez Castelao e o seu exhaustivo traballo de documentación sobre os cruceiros galegos; por outro, Giorgio Vasari, figura clave do urbanismo e da arte renacentista en Arezzo. A partir deste fío común, o alumnado investigará o contexto e a obra de ambos autores para transformalo en material gráfico impreso, deseñado e producido integramente por eles mesmos.
O proxecto permite ao estudiantado aplicar de forma práctica os coñecementos adquiridos no ciclo, á vez que se familiariza con novas realidades culturais e educativas.
Ademais, supón un momento especialmente significativo para o centro, xa que é a primeira vez que o CIFP Montecelo impulsa unha mobilidade Erasmus con alumnado de Formación Profesional Básica.
O director do centro, Miguel Carballa, valora moi positivamente a iniciativa e subliña a aposta por ofrecer oportunidades internacionais a un alumnado que, en moitos casos, parte de situacións difíciles. "Seguimos apostando pola Básica
e seguimos tratando de ofrecer ao noso alumnado máis vulnerable todas as opcións coas que contamos", sinala.
O grupo viaxa acompañado polo profesorado José Viéitez e Elena Lourido, quen xa coñecían o centro italiano tras participar o pasado curso nunha mobilidade docente Erasmus. Daquel intercambio xurdiu a posibilidade de ampliar a colaboración ao alumnado. Meses despois, a relación consolidouse coa visita de profesoras e estudantes italianas a Montecelo, dentro dun proxecto sobre transporte local sostible.
Máis aló da aprendizaxe académica, a compoñente humana é un dos aspectos máis destacados da experiencia. Para algúns dos participantes, trátase da súa primeira viaxe en avión. "É un reto, pero tamén unha oportunidade única", explica Elena Lourido, que destaca a ilusión do alumnado desde o momento en que se confirmou a súa participación. Sara Vidal, unha das estudantes, resume o sentir do grupo ao dicir que "estamos moi emocionados e con moitas ganas de aproveitalo todo".
Desde a coordinación de Proxectos Internacionais do CIFP Montecelo lembran que este tipo de mobilidades en grupo están especialmente impulsadas polo SEPIE, a axencia estatal que xestiona o programa Erasmus+. A selección do alumnado realizouse tendo en conta non só o expediente académico, senón tamén a actitude, unha proba de inglés e unha entrevista persoal centrada na motivación, co apoio do Departamento de Orientación.
Tras semanas de preparación, o obxectivo é que a experiencia sexa enriquecedora no académico e memorable no persoal.
"Adoitan ser viaxes que deixan pegada", apuntan desde o centro, "esperamos que esta sexa unha das máis doces".