Os autores das tres accións artísticas que, durante estes últimos días, sorprenderon a numerosas persoas en Montero Ríos, a praza da Pedreira e en Barcelos saían á luz este xoves 18, tras a celebración do Día das Letras Galegas. Trátase de estudantes de Belas Artes e de Ciencias Sociais que, aproveitaban as noites para levar a cabo estes traballos creativos.
Daniel Alonso, un destes artistas, explicaba co concelleiro Alberto Oubiña que, a través desta proposta, pretendían realizar unha homenaxe ao escritor ao que se lle dedicaba o Día das Letras deste ano empregando os traballos da Galiña Azul e de Vento ferido nas obras que se poden observar nas tres creacións co uso dunha orixinal perspectiva visual que se prolonga desde o chan ata os muros destes espazos.
A fórmula seleccionada é respectuosa coa contorna xa que as cintas azuis utilizadas non danan a contorna. Os autores recoñecían que algún destes traballos, que se poden considerar "trampantojos" xa sufrira danos ao tentar ser retirado por parte dalgunha persoa que tentaba retirar estes elementos.
O obxectivo dos novos artistas é que estas obras creativas permanezan ata que pase o mes de maio, mes "da lingua". Daniel Alonso, Andrea Vizcaíno e Alejandra Iannone manifestaban este xoves que lles gustou achegarse "de incógnito" polos seus traballos e coñecer as reaccións dos espectadores.