O goberno municipal recoñece que ao ámbito de San Roque, en materia de mobilidade, "non se lle puxo moita atención". Pero, segundo avanzou o edil César Mosquera, un estudo de tráfico será o primeiro paso para resolver esta situación e propor "solucións".
Este estudo, unha das medidas acordadas entre BNG e PSOE polo apoio dos socialistas aos orzamentos municipais, abarcará desde Alameda e Raíña Vitoria até toda a zona da Moureira, San Roque ou as avenidas de Uruguai e As Corbaceiras.
Será o equipo de Fernando Nebot, a consultora Viatoben, que xa foi o redactor do plan de mobilidade urbana sostible (PMUS), o que se encargue deste traballo porque, segundo Mosquera, "xa teñen un coñecemento previo" da configuración da cidade.
"Comezar desde cero suporía demorar o estudo máis tempo", defendeu o concelleiro responsable da área municipal de mobilidade, que confía en que este estudo poida estar elaborado antes de que termine este ano.
Aínda que desde o Concello defenden que este estudo se fará sen condicionantes previos, César Mosquera advertiu de que o peche de Raíña Vitoria é "irreversible", xa que cando se redactou o PMUS, que servirá de base para este traballo, "xa estaba pechada".
En San Roque, explicou Mosquera, "hai problemas que resolver" para comodidade dos seus residentes e para avanzar na súa calidade urbana. O plan, se detecta "excesos" en cuestións de tráfico, proporá unha reordenación da zona.
A "preferencia" será implantar plataformas únicas onde sexa posible, pero "se o estudo resolve que non" e conclúe que é mellor ter diferenciados os tráficos de vehículos e peóns, respectarase ese criterio técnico, garantiu o edil do BNG.
Para realizar este estudo, o equipo redactor analizará tanto o estado das rúas incluídas neste ámbito como as frecuencias e intensidades do tráfico, co obxectivo de solucionar a mobilidade "desordenada e caótica" que as autoridades municipais aprecian no barrio.
En todo caso, César Mosquera reiterou que a "vontade" do goberno municipal de Pontevedra é seguir avanzando nos "reaxustes" que sexan necesarios para garantir a evolución da zona de baixas emisións, sexa cal for o seu futuro normativo a nivel estatal.
"Seguiremos na vía e no camiño iniciado hai anos", sentenciou Mosquera, convencido de que o modelo urbano de Pontevedra contribúe a que na cidade haxa "menos ruído e menos contaminación gaseosa" e que sexa unha urbe "máis cómoda e con máis calidade de vida".