O Concello de Poio tomou a decisión de suspender os tres eventos que maior número de público congregan durante as súas tradicionais festas de San Xoán obrigado polos condicionantes de prevención sanitaria que conleva a pandemia da COVID-19.
Así este 2020 na chaira da Seca non haberá cacharela, non haberá sardiñada popular e tampouco se celebrarán verbenas. Ademais, considérase practicamente tomada a decisión de suspender os actos en honra a San Xoán ata o ano próximo, en lugar de aprazalos.
Esta decisión vén acompañada da intención de manter para a edición de 2021 as contratacións que estaban pechadas para este próximo mes de xuño. No seu lugar e para tratar de minguar o impacto que estas cancelacións conlevan, a administración local traballa con outras alternativas factibles dentro das limitacións de acción do contexto actual.
O concelleiro de Festexos, Xosé Luís Martínez, apelando sempre á precaución, expón eventos aos que poidan acudir grupos reducidos: "estamos a estudar fórmulas para os pequenos e tamén a posibilidade de organizar pequenas actuacións musicais", avanza o responsable nacionalista.
Xunto a estas propostas presenciais, búscanse outras telemáticas, a través de redes sociais, tal e como se fixo coa Festa do Maios ou o Día das Letras Galegas.
Ante a toma de decisións como esta, con consecuencias de importante calado para a economía local, Martínez estima que "este é o procedemento adecuado neste momento", pero tamén critica a falta de implicación da Xunta de Galicia por "a ausencia de directrices sobre as verbenas de verán, limitándose unicamente a non opoñerse á celebración deste tipo de eventos".
Nese mesmo sentido, o Concello de Poio está a esperar unha decisión das autoridades competentes sobre permisos para realizar cacharelas particulares: "deben aclarar esta cuestión, e sobre todo, en que condicións poderíanse realizar en caso de aprobalas".