Por terceiro mes consecutivo, os datos de desemprego na cidade de Pontevedra non foron positivos. Un total de 68 pontevedreses máis sumáronse ás listas do paro no mes de novembro, segundo informou este luns a Consellería de Economía, Emprego e Industria. Así, a 30 de novembro había na Boa Vila 6.240 persoas sen emprego, un 1,08% máis que o mes anterior.
Este aumento foi xeneralizado en todos os concellos da área de influencia de Pontevedra, agás as excepcións de Barro, Cerdedo-Cotobade, Cuntis, Moraña, Ponte Caldelas e Vilaboa. Os maiores incrementos, con todo, déronse en Sanxenxo e O Grove.
| Novembro | Outubro | Variación | |
| Pontevedra | 6.240 | 6.172 | 68 |
| Barro | 288 | 297 | -9 |
| Bueu | 819 | 790 | 29 |
| Caldas de Reis | 806 | 788 | 18 |
| Cambados | 1.113 | 1.082 | 31 |
| Campo Lameiro | 143 | 140 | 3 |
| Cerdedo-Cotobade | 365 | 372 | -7 |
| Cuntis | 337 | 338 | -1 |
| O Grove | 985 | 829 | 156 |
| A Illa de Arousa | 302 | 314 | -8 |
| A Lama | 181 | 170 | 11 |
| Marín | 1.821 | 1.795 | 26 |
| Meaño | 416 | 393 | 23 |
| Meis | 384 | 379 | 5 |
| Moraña | 347 | 362 | -15 |
| Poio | 1.184 | 1.176 | 8 |
| Ponte Caldelas | 530 | 555 | -25 |
| Portas | 210 | 219 | -9 |
| Ribadumia | 367 | 358 | 9 |
| Sanxenxo | 1.312 | 1.179 | 133 |
| Vilaboa | 431 | 441 | -10 |
| Vilagarcía de Arousa | 3.645 | 3.577 | 68 |
| Vilanova de Arousa | 805 | 797 | 8 |
DATOS PROVINCIAIS
O paro rexistrou un lixeiro incremento na provincia de Pontevedra durante o mes de novembro. O número de demandantes de emprego sitúase en 74.475 persoas, 174 máis que un mes antes.
O incremento rexistrado sitúase no 0,23%, o máis baixo de toda Galicia. No conxunto da comunidade, o número de persoas en paro rexistradas nas oficinas do Servizo Público de Emprego Estatal ( SEPE) aumentou un 0,68%, sendo A Coruña (1,03%) e Lugo (1,38) as provincias con maior aumento. En Ourense creceu menos, pero, en todo caso, máis que na provincia de Ponteveda, un 0,47%.
Galicia pechou novembro con 187.175 inscritos como demandantes de traballo nos servizos públicos de emprego. A pesar de que a provincia de Pontevedra é a que menos incremento rexistrou no número de parados, é a que ten maior número de parados, 74.475 fronte aos 73.978 da Coruña. Lugo (18.321) e Ourense (20.401) teñen menor número de poboación e tamén de desempregados.
Segundo os datos publicados este luns polo Ministerio de Emprego e Seguridade Social, no último ano o paro diminuíu na provincia de Pontevedra en 6.720 persoas, un 8,28%, con respecto a un ano antes, novembro de 2016.
En España, o número de parados rexistrados nas oficinas do paro subiu en novembro en 7.255 desempregados respecto ao mes anterior (un incremento do 0,2%), situándose en 3.474.281 desempregados, o nivel máis baixo do últimos oito anos.