O modelo urbano de Pontevedra foi obxecto de debate nun ciclo de seminarios e conversas organizado na localidade suíza de Xenebra. Ata alí viaxou o alcalde, Miguel Anxo Fernández Lores, que foi o encargado de intervir neste foro de expertos.
O ciclo está organizado polo Banque Cantonale de Genève (BCGE) baixo o nome "L'essentiel de la finance". Nel, Fernández Lores expuxo o modelo implantado na cidade.
Foi unha conferencia bastante específica, baseada en amosar exemplos claros das medidas adoptadas pola Boa Vila para a súa transformación nunha cidade máis amable coas persoas.
O convite partía dun interese básico, que é o de recuperar o centro da súa cidade, para o que buscan novas ideas, estudando outros modelos e proxectos internacionais.
O rexedor pontevedrés explicou a este respecto que "hai que avanzar", que hai que recuperar e encher as rúas de actividades e promover un modelo sostible co medio ambiente, na procura dun futuro mellor para todos os veciños de calquera cidade.
Logo de rematar a súa exposición, Virginie Fauveau, membro do consello executivo do BCGE, destacou o "dinamismo" e o "entusiasmo" demostrado polo alcalde sobre una cidade que definiu como unha urbe "vangardista e sostible".