A celebración do Entroido de Cobres, no concello de Vilaboa, viviu este domingo unha segunda xornada marcada pola inestabilidade meteorolóxica.
A presenza da choiva motivou que a comitiva de madamas e galáns trasladase a súa actividade dos camiños ao interior das vivendas da parroquia, unha práctica que pon de manifesto o vínculo entre a festa e a hospitalidade da veciñanza.
Ante a imposibilidade de realizar as danzas a ceo aberto, os residentes de Cobres abriron as portas das súas casas e adegas para acoller os músicos e bailadores.
Esta dinámica permite manter vivo o carácter comunitario da celebración, onde as familias preparan refrixerios para os integrantes da comitiva durante o seu percorrido por Santa Cristina e San Adrián.
Esta forma de celebrar o Entroido remite á tradición histórica da parroquia. Antigamente, a comitiva anunciaba a súa chegada con foguetes e visitaba cada fogar para solicitar achegas económicas para a organización dos festexos.
En sinal de gratitude, as madamas e galáns ofrecían bailes cunha duración e solemnidade estaban vinculadas á contía do donativo recibido.
A actividade festiva desprazoue durante a tarde deste domingo á carpa de Riomaior. As madamas e galáns tamén ofrecerán un baile co acompañamento do grupo de Veteranas e Veteranos do Entroido.
Para pechar a xornada, a organización programou unha verbena nocturna no mesmo recinto cuberto.
A música de Son das Tabernas será a encargada de pór o peche a este segundo día de Entroido.
