Marín deu este venres a benvida ao verán co izado das Bandeiras Azuis e co inicio do servizo de socorrismo.
A alcaldesa, María Ramallo, acudiu este mediodía ao areal de Portocelo para izar o distintivo que aporta a Adeac e que serve para demostrar o coidado que se ten polo litoral.
Ademais, co arranque da tempada estival tamén inician o traballo do servizo de socorrismo para garantir en todo momento a seguridade nos areais. Haberá 21 socorristas, 3 patróns e un coordinador do servizo, que estará activo ata a primeira semana de setembro. Os areais de Mogor e Aguete, por ser os que maior afluencia soportan, estarán máis reforzados.
Ademais, ao longo destes últimos días levaron a cabo un traballo integral de mantemento do vial e das praias, co desbroce da maleza tanto no propio vial coma nos accesos e coa limpeza da area. Asemade, están en funcionamento os baños.