A pesar das restricións impostas pola pandemia do coronavirus, Marín resístese a suspender as súas festas patronais, as Festas do Carme. Iso si, as deste ano serán moi diferentes.
O Concello avanzou este xoves que as festas apostarán por actividades de pequeno formato e apelará á responsabilidade dos veciños para poder celebralas con seguridade.
Así, entre outras cuestións, o goberno municipal avanza que nesta "nova normalidade" non haberá actuacións musicais de gran formato ou verbenas nin atraccións de feira.
Será unha modalidade de festas menos multitudinaria, na que primará a ambientación e a animación musical e outras actividades culturais que permitan aforos máis limitados e, por tanto, un ocio seguro e controlado, "acorde cos tempos que estamos a vivir", di o Concello.
A alcaldesa, María Ramallo, entende que "non podemos festexar o Carme como sempre o fixemos" porque, a pesar de que a situación sanitaria parece estar controlada "non podemos esquecer todo o que se viviu nestes últimos meses".
Esta programación festiva, que será presentada nas próximas semanas, chegará a diversos puntos do casco urbano, segundo garante o goberno municipal.