O novo Auditorio de Marín abrirá oficialmente as súas portas este venres 15 de maio.
O acto inaugural marcará o inicio da actividade desta infraestrutura cultural, chamada a converterse nun referente para a vida social e cultural do municipio.
A inauguración celebrarase pola tarde e contará coa asistencia de representantes das distintas administracións que participaron na financiación do proxecto, así como de colectivos culturais, veciñais, sociais, comerciais, educativos e comunidades de montes, entre outros ámbitos do tecido asociativo marinense.
Cada unha destas entidades terá reservadas dúas localidades no recinto, mentres que o resto das 500 butacas dispoñibles serán de acceso libre para a cidadanía ata completar aforo.
A alcaldesa de Marín, María Ramallo, destacou a importancia desta xornada, que definiu como "un día excepcional para Marín".
Segundo explicou, o programa previsto inclúe animación nas rúas e unha visita institucional ás instalacións.
No acto central haberá distintas sorpresas para as persoas asistentes.
A rexedora subliñou ademais que a apertura do auditorio supón “o pistoletazo de saída” dunha nova etapa para a cultura local, dotando ao municipio dun espazo moderno e estable para o desenvolvemento de actividades culturais e sociais.
Engade Pontevedra Viva como fonte preferida de Google de balde
Mantente informado coas últimas noticias de actualidade.