Cen mulleres desempregadas de Marín iniciaron este venres un programa integral de emprego deseñado para mellorar as súas competencias e facilitar a súa inserción no mercado laboral.
A iniciativa, impulsada polo Concello de Marín, ofrecerá ás participantes unha serie de accións formativas e de orientación laboral personalizadas.
Estas son a información, orientación e asesoramento, formación, técnicas de coaching, intelixencia emocional e técnicas de motivación para buscar emprego por conta propia e allea, habilidades sociolaborais e talleres de entrevista, fomento da capacidade emprendedora, prácticas profesionais non laborais, prospección empresarial, emparellamento de ofertas de traballo coas persoas demandantes e mobilidade laboral.
Todas estas actividades estarán adaptadas á realidade das mulleres participantes, que deberán facer, polo menos, cinco delas individuais de aquí a setembro e asistir a tres colectivas co resto de participantes. Por cada unha delas recibirán 10 euros.
O programa está subvencionado pola Consellería de Emprego, Comercio e Inmigración cun importe de 176.000 euros, achegando os 44.000 restantes o Concello de Marín até completar os 220.000 euros de orzamento máximo.
As subvencións están financiadas a través dos fondos finalistas do Servizo Público de Emprego Estatal.