Marín lembra ás vítimas do Pitanxo

No Paseo Alcalde Blanco de Marín tivo lugar este sábado un acto de recordo con motivo do afundimento da Vila de Pitanxo en augas de Terranova. Un naufraxio no que perderon a vida 21 mariñeiros, 12 dos cales seguen sen ser localizados.

Familiares e amigos dos mariñeiros xunto a representantes de institucións, civís e militares, e políticos de diferentes formacións participaron nesta homenaxe ante o monumento que lembra aquela traxedia.

Neste acto interveu a Valedora do Pobo, María Dolores Fernández Galiñanes, que lembrou "a loita das familias contra os elementos", para buscar que se localizasen os corpos, "para que se baixara ao barco para contribuír a saber a verdade" ou para que se escoitase o testemuño do supreviviente Samuel Kwesi.

Tamén citou o empeño das familias para que se adopten medidas xudiciais "para que se coñeza a verdade e se depuren as responsabilidades", sinalou a Valedora.

A portavoz das familias, María José de Pazo entregou a Samuel Kwesi a Medalla do Centenario do Memorial aos Caídos en San Xoán de Terranova que lles foi concedida ás familias por parte da vicegobernadora xeral de Terranova e Labrador, Joan Marie Aylward.

Este mariñeiro lembrou aos seus compañeiros falecidos, "vosotros no les véis, pero yo les veo cada día", dixo nomeando un a un a todos eles.

"Yo no espero ninguna medalla, tengo que aceptarla, pero esta medalla no tenía que ser para mí, tenía que ser para mis compañeros, porque en el momento en que yo no podía hacer nada, ellos también estaban allí para ayudarnos; ellos también me protegían a mí para que yo no muriera", afirmou un emocionado Samuel Kwesi.

De Pazo esixiu "justicia" e "verdad" e tamén tivo palabras de agradecemento á Armada, polo apoio brindado durante todo este tempo, e á tripulación do Menduíña II, pola súa axuda no rescate e "su defensa de la verdad".

Durante esta homenaxe tamén se lembrou ás vítimas do naufraxio do Argos Georgia.

A cerimonia concluíu cunha ofrenda floral e a interpretación de salve mariñeira.