Marín reabre o pavillón do Sequelo tras unha renovación de 725.000 euros

O presidente da Deputación de Pontevedra, Luís López, e a alcaldesa de Marín, María Ramallo, visitaron este mércores o renovado pavillón municipal do Sequelo.

Nas súas intervencións ambos puxeron en valor a colaboración entre a administración provincial e o Concello de Marín para modernizar estas instalacións deportivas transformándoas nun recinto "de primeira" para o uso dos clubs e da cidadanía.

Durante a visita, López e Ramallo estiveron acompañado por representantes de clubs deportivos locais e participantes dos campamentos municipais de verán.

O presidente provincial subliñou que a actuación reflicte a aposta conxunta por mellorar os equipamentos deportivos e lembrou que hai un ano ambas as administracións inauguraban a reforma integral do pavillón da Cañota.

Entre as dúas actuacións, a Deputación destinou 710.000 euros de financiamento provincial.

No caso do Sequelo, os 250.000 euros proceden do Plan +Provincia, mentres que os 480.000 euros restantes foron financiados con fondos europeos obtidos polo Concello de Marín.

As obras permitiron unha renovación integral do edificio, con actuacións orientadas a incrementar a eficiencia enerxética, mellorar a accesibilidade, reforzar a estrutura do inmoble, substituír a cuberta e as fachadas, ademais de acondicionar a pista deportiva.

A alcaldesa de Marín agradeceu a "paciencia" das entidades deportivas que habitualmente utilizan o pavillón e que durante varios meses tiveron que buscar alternativas debido á execución das obras.

Ramallo destacou que a renovación permitirá recuperar a actividade habitual nunhas instalacións modernizadas e preparadas para acoller numerosas competicións e actividades deportivas.

Durante a súa intervención, o presidente provincial defendeu que este tipo de proxectos son o resultado dunha planificación previa e da capacidade das administracións para captar financiamento externo, o que, segundo sinalou, reduce o esforzo económico dos concellos.

Nese contexto, eloxiou a xestión da alcaldesa e o seu labor tanto á fronte do Concello como na Deputación de Pontevedra, onde forma parte como deputada do grupo de goberno.

Por último, María Ramallo avanzou que o Concello xa traballa en novos proxectos de mellora para outras infraestruturas deportivas do municipio, entre elas o pavillón da Raña e a bancada do campo de fútbol de San Pedro, actuacións para as que confía en seguir contando co respaldo económico da Deputación de Pontevedra.