A Sociedade Gastronómica e Cultural de Pontevedra-Turoqua (SGCP) creou os I Premios Gastroculturais, unha iniciativa que busca recoñecer o traballo de persoas e colectivos que desenvolven a súa actividade nos ámbitos da cultura e a hostalaría tanto na cidade como no resto da provincia.
A entrega destas distincións realizarase o sábado 30 de maio, a partir das 21:00 horas, durante unha cea de gala no Liceo Casino de Pontevedra.
Segundo explicou o presidente da entidade, Mito Meijón, colaborador de PontevedraViva, o certame nace coa intención de outorgar visibilidade á innovación e ás traxectorias profesionais que definen a identidade local.
A organización seleccionou oito perfís que representan diferentes sectores da vida social pontevedresa:
-
Varo López Redondo: Director de cine, tras o seu recente paso polo Festival de Málaga coa curtametraxe "Lago Silente".
-
Marta González: Responsable de establecementos dedicados á música en directo e a dinamización social como La Gramola ou PintxoViño.
-
Libraría Cronopios: Pola súa actividade continuada no fomento da lectura.
-
Club de lectura "Se buscan mujeres valientes": Iniciativa da Libraría Seijas en colaboración co Pub A Verbena.
-
Feira Etiqueta Negra: Encontro profesional que reúne anualmente máis dun centenar de propostas gastronómicas.
-
Mariscos Cachada: Posto do Mercado de Abastos recoñecido pola preservación do oficio tradicional e o produto autóctono.
-
Bar Estrela: En conmemoración da súa 50º aniversario como punto de encontro na hostalaría da cidade.
-
"É" Restaurante: Pola súa proposta de integración entre o deseño arquitectónico e a oferta culinaria.
A gala terá un carácter solidario, xa que os beneficios se destinarán á Fundación Banco de Alimentos de Pontevedra.
O custo da asistencia é de 45 euros e as entradas poden adquirirse ata o 25 de maio no Pub La Gramola ou a través dos sistemas de reserva dispoñibles no Liceo Casino. Tamén a través deste enlace.
Para quen desexe colaborar sen asistir á cea, a organización habilitou unha "Mesa Cero".
O programa da noite inclúe unha sesión musical e o sorteo de diversos artigos doados para a causa.
Entre estes artigos atópanse pezas de artistas como Antón Sobral, Carmen Hermo, Tito Villa, Galia Blanco, Mila Alonso, Rafa Loureiro ou Leopoldo López, ademais de exemplares asinados do último libro do escritor Manel Loureiro.
A organización estableceu un protocolo de vestimenta formal para a asistencia ao evento.