A desescalada deseñada polo Goberno, que establece unha reactivación progresiva da actividade económica, situou aos negocios que operan baixo o sistema de cita previa como os primeiros que poderán reabrir tras semanas de parón forzoso.
Así o recolle o documento presentado este martes polo executivo central que sitúa a estes establecementos dentro da denominada como fase cero, que comezará o luns 4 de maio.
Poderán reabrir, por tanto, salóns de peiteado, barberías, negocios de estética, clínicas dentais, centros ópticos ou clínicas de fisioterapia, entre outras actividades. Iso si, a atención será individual e non poderán ir xuntas varias persoas.
Todos eles, segundo as normas fixadas polo Goberno, deberán contar con mostrador ou biombos no local ou, polo menos, garantir a máxima protección de traballadores e clientes.
Será obrigatorio, por outra banda, que se usen máscaras de protección e luvas se a atención aos usuarios destes establecementos require ter contacto con eles.
Haberá ademais un horario especial e preferente para atender aos maiores de 65 anos, poboación de risco durante a crise do coronavirus, para reducir o perigo de contaxio.
Desde o Goberno explican que, en todo caso, a apertura de todos estes negocios é voluntaria. É dicir, se o establecemento desexa seguir pechado por seguridade e esperar a fases máis avanzadas da desescalada poderá facelo.