A concellaría de xestión dos residuos urbanos, que dirixe Raimundo González, acaba de renovar parte do parque de colectores de carga frontal que dá servizo ao centro histórico.
O Concello, a través da empresa concesionaria Ferrovial Servicios, instalou quince novos colectores en distintos puntos da zona monumental substituíndo a outros que tiñan "esgotada a súa vida útil" por diversos motivos, especialmente, polo uso. Esta substitución continuará no mes de novembro coa instalación doutros dez novos colectores de carga frontal no ámbito periurbano.
A maior parte da recollida de lixo en Pontevedra é de carga lateral (faise polo lado dereito do camión), pero no caso do centro histórico faise con carga frontal porque o camión de recollida de carga lateral non colle polas rúas da zona monumental, o que supón que os colectores sexan máis pequenos.
Ademais, foi unha decisión consensuada co Centro Comercial Zona Monumental dende hai anos a instalación dos colectores do centro histórico ben nas rúas perimetrais ou ben en rúas pouco transitadas tratando de mellorar a imaxe visual do centro histórico.
Segundo informa o Concello de Pontevedra, esta medida, que se complementará con outra substitución na zona periurbana no vindeiro mes, "pretende acompasar a unha sociedade cada vez máis esixente no tratamento dos residuos urbanos e seguir a senda marcada polo programa Efecto PO2 de posicionamento da cidade que centrará a acción municipal no presente mandato".
A recente cambio de contedores vén a sumarse á campaña que acaba de pór en marcha a concellaría de xestión dos residuos recordándolles aos establecementos comerciais deste ámbito (hostalería, comercio, restauración...) o servizo de recollida porta a porta de vidro e cartón/papel, que se vén desenvolvendo por parte da concesionaria dende o ano 2008.
Todas as medidas, e as futuras que a concellaría está a planificar, "van encamiñadas a incrementar a participación veciñal na xestión dos residuos na cidade, unha liña de traballo principal no presente mandato".
Engade Pontevedra Viva como fonte preferida de Google de balde
Mantente informado coas últimas noticias de actualidade.