O PP, a través dun comunicado, sinala que "a tolemia parece desatarse no gabinete de Lores" a tan só 72 horas da celebración do pleno dos orzamentos. O grupo municipal que lidera Jacobo Moreira afirma que o alcalde se atopa "desesperado, illado e en declive" para a continuación engadir que "estruja" á administración, "ordenando frenéticamente aos funcionarios emitir informes express".
Segundo sinalan os populares, nas últimas horas emitiuse un informe xurídico que se pronuncia sobre unha cuestión na que a Intervención non solicitou que se informase e ademais sobre a que nin o secretario do Pleno nin o portavoz do goberno, Raimundo González, chegaron a cuestionalo na comisión.
Nese informe indícase que a emenda do Partido Popular á Base 13 das bases de execución non está motivada, a pesar de ser votada no momento procedimental. Moreira entende que Lores quere torpedear o que foi votado e aprobado lexitimamente. O PP indica que emendará esta cuestión.
Apuntan, sinalando que Lores está "perdido como un pito sen cabeza", que se produciron irregularidades porque os informes teñen que estar emitidos e a disposición dos concelleiros no momento da convocatoria.
Finalmente, Jacobo Moreira sinala que segue tendendo a man ao goberno local para buscar o mellor orzamento para Pontevedra.