Ante os veciños que quixeron acercarse este luns ao Centro Cultural de Monte Porreiro, o Partido Popular de Pontevedra presentou o proxecto definitivo para o soterramento da liña de alta tensión que cruza este barrio.
No acto, aberto a toda a veciñanza, os populares sinalaron que o inicio das obras do soterramento da liña de alta tensión en todo o tramo do barrio de Monte Porreiro é "inminente", pois neste momento tan só falta a licencia municipal para poder comezar.
Todo o proxecto transcorre por espazo público polo que a duración estimada das obras é de tres meses aproximadamente, dependendo das condicións meteorolóxicas.
Jacobo Moreira deu os parabéns aos veciños presentes e agradeceu o "compromiso firme da administración galega" con este proxecto tras chegar a un acordo con Fenosa para que a empresa o incluíse no seu plan de investimentos 2018-2020.