O periplo delituoso dun dos ladróns máis "escorregadizos e perigosos", segundo as súas propias palabras, aos que se enfrontou a Policía Nacional nos últimos tempos, sumou un novo episodio.
O ladrón que subtraía coches en Pontevedra e fuxía con eles a Portugal, protagonizando rechamantes persecucións policiais, está detrás do furto dun patinete valorado nuns 1.000 euros.
A propietaria deste vehículo de mobilidade persoal, segundo informou a comisaría provincial, deixárao aparcado na Praza da Leña.
Amarrárao a unha das terrazas da praza e cando volveu a por el, catro horas despois, atopou que o patinete desaparecera e que o cadeado estaba tirado no chan tras ser cortado.
Pouco despois, varios axentes que estaban a realizar labores de seguridade cidadá pola zona comercial, observaron a un individuo conducindo un patinete eléctrico que respondía as características do que fora roubado.
Os policías deron o alto á persoa que o conducía á altura da rúa Benito Corbal e, ao comprobar os datos do patinete, acreditaron que era o desaparecido.
Tras detelo como autor dun delito de furto, as autoridades localizaron no interior dun dos seus petos unha cizalla coa que, posiblemente, cortou o cadeado do patinete.
O patinete acabou sendo devolto á súa lexítima propietaria.
O detido, tras pasar por sede xudicial, foi posto a disposición da autoridade xudicial.