A Feira Franca contará cun Plan de Seguridade, elaborado pola Policía Local. Entrará en vigor ás 11.00 horas do sábado 3 e concluirá ás 03.00 horas do domingo 4.
Durante o sábado, un equipo da Policía Local e dos Bombeiros de Pontevedra inspeccionará os postos instalados nas distintas zonas para determinar se a instalación adáptase ás normas establecidas pola organización da Feira Franca.
Entre estas medidas atópase o uso só de carbón nas grellas, a presenza de extintores nas proximidades; instalación de postos unicamente autorizados; e evitar ocupación de vías de penetración e evacuación.
Nesta vixésimo primeira edición instalaranse os seguintes puntos de emerxencia: un posto avanzado médico no Teatro Principal; tres ambulancias en Valentín García Escudero; Bastida/Michelena e Alameda. Protección Civil manterá o seu posto central na Praza de Ourense e os Bombeiros, na Praza de España e en Valentín García Escudero.
Instalaranse unha serie de extintores para o seu uso en diversos puntos do centro histórico e zonas de celebración da festa medieval.
VÍAS PARA OS SERVIZOS DE URXENCIA
No Plan contémplase, para garantir o tránsito e as posibles intervencións de auxilio, que os servizos de urxencia terán como vías principais de evacuación e penetración a Rúa Real, Sarmiento, Isabel II, Curros Enríquez, Fernández Villaverde e Michelena.