Case 37 graos -36,85 para ser exactos- levaron á cidade de Pontevedra ao que foi, até agora, un dos días máis calorosos do ano.
En plena vaga de calor que está a azoutar todo o país, con temperaturas especialmente extraordinarias no norte, pouco refuxio había para escapar deste tórrido día.
Así, as praias das Rías Baixas mostraron un cheo case absoluto durante toda a xornada do sábado, unha estampa que seguramente se repita os próximos días.
Os que quedaron na cidade usaron todo tipo de recursos.
Desde asistir a eventos con ventilación, como a Festa dos Libros, refrescarse nas fontes ou refuxiarse á sombra en parques e terrazas da hostalaría.
Os 36,85 graos rexistrados por Meteogalicia na estación meteorolóxica de Campolongo non foi a única anomalía que deixa esta vaga de calor.
A temperatura media de todo o día non baixou dos 27 graos e a mínima estivo roldando os 20. A sensación foi aínda maior ante a práctica ausencia de vento.
De cara aos próximos días, aínda que a situación parece que irá atenuando un pouco, a calor seguirá sendo a tónica reinante. Polo menos, a curto prazo.
Para este domingo, as previsións de Meteogalicia sitúan as máximas para Pontevedra nos 34 graos, un rexistro que se estima aínda menor -30 graos- para o luns.
Os termómetros continuarán por encima dos 30 graos, polo menos, até o xoves.