Os pontevedreses mostran a súa 'fame' pola Feira Franca comendo ao aire libre no centro histórico

Non quedou nin un só espazo no centro histórico de Pontevedra no que non se vivira ao grande esta Feira Franca.

E, como é mester, gran parte desta 'culpa' foi das miles de persoas que protagonizaron as tradicionais comidas e ceas na rúa.

Case 160 mesas particulares foron autorizadas nesta ocasión, ás que se sumaron outros tantos postos autorizados para a hostalaría local, que deron de comer e beber a todos aqueles campesiños, nobres e guerreiros que decidiron non organizar o seu propio banquete.

Menús de todo tipo, nos que predominaron as carnes asadas ou as empanadas, coroaban as mesas instaladas polos participantes, decoradas para a ocasión con todo tipo de aveños.

Foron en postos decorados con todo esmero e coidado, como obriga a normativa da propia Feira Franca. Debían de ser de madeira ou estar cubertos con tecidos rústicos.

Tamén se prestaba atención á louza empregada nas comidas. Tiñan que ser, obrigatoriamente, de barro ou madeira e estaba prohibido deixar á vista botellas de plástico, latas ou calquera material que non pasase por medieval.

A implicación da cidadanía foi absoluta e todos lograron gozar dunha boa xornada de festa, en compañía de amigos e familiares, demostrando por que a Feira Franca é unha festa máis que consolidada e un dos eventos que máis xente atrae á cidade.

A Feira Franca, declarada festa de interese turístico de Galicia, conmemora o mercado dun mes libre de impostos co que o rei Enrique IV premiou en 1463 á Boa Vila pola súa fidelidade, quince días antes e outro quince despois de 24 de agosto, festividade de San Bartolomé.

Nesta edición, o número 24 desta festa, está dedicada ás meigas, convertendo a Pontevedra en "terra de encantos, feira de lendas e feitos, romaría de risas e abrazos", segundo destaca a organización.